وجهة نظر

انا لي في بحور الشعر مركب  واتجـاه  وذوق ولي وجهة نظر في حبك شعـري واتجاهاتـي

احبك القاف كالشعار بالمعنى  واسوقه  سوق واحدد به مدى الانظار وأجمـل بـه ابياتـي

طلعت البارحه في الرجم ماعندي ولا  مخلوق اجر الصوت من حر الزمن والناس  بالذاتـي

إذا كان الزمن له حق عندي لي معاه حقـوق يلمح بالجفا لـي ميـر للمعبـود مشكاتـي

تحققت ولقيت ان الذهب من صاحبه مسروق يخونـون العهـد مـن بيننـا و الاتفاقاتـي

يحز بخاطري لاشفت بعض الخلق بالشاهـوق وطرقان الشوارب في الشـوارع والمحطاتـي

وانا مانيب قالط كل وجبه في صحن  مرقوق ولله الثنـا والشكـر تكفينـي علاقـاتـي

ولا لي فخر في خوة زعيمن شاربـه محلـوق تريس في شعيب اهـل النذالـه والمزاجاتـي

انا من روس قحطان العرب والمجلس  المرموق واعرف الجلسه اللي تلحق الرجال شرهاتـي

اذا كانت عتيبه تنقسم برقـا وقسمـن روق ولي معهم على عهد الوفا روحـه  وجياتـي

سلام الله عليهم عد مالاحت سمـاه  بـروق وتقديـري هديـه وافيـه تحكـي  تحياتـي